ភ្នំពេញ៖ គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) សហការជាមួយក្រសួងការពារជាតិ បានបន្តធ្វើការផ្តល់ជូននូវវ៉ាក់សាំងបង្ការជម្ងឺកូវីដ-១៩ ជូនដល់បុគ្គលិក និងកម្មករ-កម្មការិនីសាងសង់ភូមិកីឡា នៅពហុកីឡដ្ឋានជាតិមរតកតេជោចំនួន ៦៤៩នាក់ទៀត ដែលរៀបចំក្នុងពហុកីឡដ្ឋានជាតិមរតកតេជោ នាព្រឹកថ្ងៃទី២២ ខែកក្កដា ឆ្នាំ២០២១នេះ។

មន្ដ្រីគណៈកម្មាធិការជាតិ CAMSOC បានឲ្យដឹងថា នេះគឺជាការផ្តល់ជូនវ៉ាក់សាំងការពារកូវីដ-១៩ លើកទី៥ ហើយ ដែលជាកិច្ចសហការគ្នារវាងគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) សហការជាមួយក្រុមគ្រូពេទ្យក្រសួងការពារជាតិ ដោយ៣លើកជាការចាក់វ៉ាក់សាំងជូនដល់ថ្នាក់ដឹកនាំ មន្ដ្រី គ្រូបង្វឹក កីឡាករ-កីឡាការិនី និងសហព័ន្ធកីឡាជាតិ នៅមន្ទីរពេទ្យព្រះកេតុមាលា ខណៈមានមួយលើកទៀតជាការចាក់ជូនបុគ្គលិក កម្មករ-កម្មការិនីសាងសង់សំណង់អគារប្រវត្តិសាស្រ្តពហុកីឡដ្ឋានជាតិមរតកតេជោផ្ទាល់តែម្តង ដោយមានការចាក់ជូនសរុប ៣៣៥នាក់ និងលើកនេះមានចំនួន ៦៤៩នាក់ បូករួមទាំងការចាក់ ៣លើកនៅមន្ទីរពេទ្យព្រះកេតុមាលា ១,៣៦៣នាក់ នាំឱ្យការចាក់សរុបនៃកិច្ចសហការរវាងគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) សហការជាមួយក្រុមគ្រូពេទ្យក្រសួងការពារជាតិមានចំនួន ២,៣៤៧នាក់។

ចំពោះការផ្តល់វ៉ាក់សាំងដល់បុគ្គលិក និងកម្មករ-កម្មការិនីសាងសង់ភូមិកីឡា នៅពហុកីឡដ្ឋានជាតិមរតកតេជោនេះ គឺជាការផ្តល់នូវការយកចិត្តទុកដាក់បន្ថែមទៅលើកម្មករ កម្មការិនី ជាពិសេសគឺដើម្បីជម្រុញ និងពន្លឿនដំណើរការសាងសង់ភូមិកីឡានេះ ឱ្យបានចប់សព្វគ្រប់និងរួចរាល់តាមផែនការដែលបានគ្រោងទុក សម្រាប់ទទួលស្វាគមន៍ប្រតិភូកិឡាមកពីបណ្តាប្រទេសនានាក្នុងតំបន់ ដែលនឹងប្រមូលផ្តុំគ្នាចូលរួមប្រកួតព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម នៅប្រទេសកម្ពុជា នាឆ្នាំ២០២៣ខាងមុខ៕





រូបភាព៖ Cambodia SEA GAMES 2023